कसाब अक्कल(दाढा)वाला

कसाब हा २० वर्षांपेक्षा अधिक म्हणजेच प्रौढ असल्याचा अहवाल जेजे हॉस्पीटलने दिलाय. विशेष कोर्टाने कसाबच्या हाडांची आणि दातांची चाचणी करण्याचे आदेश दिले होते. या चाचण्यांमुळे व्यक्तीचं वय कळण्यास मदत होते. हॉस्पीटलने दिलेल्या अहवालात कसाब हा २० वर्षांपेक्षा अधिक वर्षाचा असल्याचं सांगण्यात आलंय. या चाचण्या घेण्यासाठी जेजे हॉस्पीटलच्या चार डॉक्टरांची टीम बनवण्यात आली होती. कसाबच्या अक्कलदाढा पूर्णपणे विकसित झाल्या आहेत तसंच त्याची हाडंही विकसित झाली असल्याचा अहवाल या टीमने दिलाय. कसाब ने कोर्टामध्ये तो अल्पवयीन असल्याचा दावा केला होता. यावर पहिले कसाबच्या वकीलांनी आणि नंतर विशेष सरकारी वकीलांनी त्याचं वय निश्चित करण्यात यावं यासाठी कोर्टाला विनंती केली होती. कसाबच्या वकीलांनी या अहवालावर आपण वैद्यकीय सल्ला घेऊ आणि रिपोर्ट देणा-या डॉक्टरांना काही प्रश्न विचारायचे असल्याचं सांगितलं ज्यामुळे कोर्टाने बुधवारी म्हणजेच २९ एप्रिलला जेजे हॉस्पीटलच्या डॉक्टरांना साक्ष देण्यासाठी कोर्टात हजर रहाण्याचे आदेश दिलेत. कोर्टाने २८ एप्रिलला आर्थर रोड च्या अधीक्षक स्वाती साठे यांची साक्ष नोंदवून घेतली. कोर्ट डॉक्टरांच्या साक्षीनंतरच कसाब अल्पवीयन आहे की नाही याचा फैसला सुनावणार आहे.