तो कसाबच होता....

भास्कर सावंत यांच्यापाठोपाठ पोलीस निरीक्षक संजय गोविलकर आणि सहाय्यक उपनिरीक्षक हेमंत बावधनकर यांनीही कसाबला ओळखलं. बावधनकर यांनी आपण कसाबकडून एके-४७ रायफल हिसकावून घेताना जखमी झाल्याचं कोर्टाला सांगितलं. बावधनकर यांनीच कसाबचा साथीदार अबू इस्माईलला गोळीबार करून जखमी केलं होतं. हे सगळं कोर्टात सुरू असताना कसाब ह्यॅ....ह्यॅ करून हसत होता. यावर न्यायाधीश एम.एल.तहिलयानी यांनी कसाबकडे एकदा बघितलं आणि त्याला पुन्हा एकदा झापलं. न्यायधीशांनी तू का हसतो असं विचारलं असता त्याने मिडीयाचे लोकं हसवतात असं सांगून मिडीयाच्या नावावर बिल फाडण्याचा प्रयत्न केला. मात्र खरी गोष्ट अशी आहे की जेव्हा जेव्हा सुनावणी दरम्यान शहीद पोलीस अधिकारी तुकाराम ओंबळे यांचं नावं घेतलं गेलं तेव्हा तेव्हा कसाब हसताना दिसलाय.
बावधनकरांच्या साक्षीनंतर संजय गोविलकर यांनी कोर्टापुढे साक्ष दिली. कसाबने केलेल्या गोळीबारात जखमी झाल्यानंतरही हातात शस्त्र नसताना कसाबला कसं जेरबंद केलं याचा अनुभव सांगितला. या दोघांच्या साक्षी झाल्यानंतर कसाबचे वकील अब्बास काझमी यांनी उलटतपासणीत या दोन्ही
अधिकार-यांनी सांगितलेल्या बाबी खोट्या असल्याचं पटवून देण्याचा प्रयत्न केला