कसाब बोगस आहे...

विशेष कोर्टामध्ये हैद्राबादच्या अरूणोदय पदवी महाविद्यालयाचे प्रिन्सिपल जी.राधाकृष्णन यांना बोलावण्यात आलं. कसाब आणि त्याच्या इतर सहा साथीदारांकडे सापडलेली अरूणोदय कॉलेजची आय.डी बोगस असल्याचं राधाकृष्णन यांनी कोर्टाला सांगितलं. राधाकृष्णन यांच्यासह कोर्टात पाच साक्षीदारांच्या साक्षी नोंदविण्यात आल्या. यात नायर रुग्णालयातील मुख्य आणि सहाय्यक नोंदणी अधिकारी तसंच अबू इस्माईलकडून सापडलेला बॉम्ब चौपाटी येथे निकामी करतेवेळी उपस्थित असलेल्या पंचाचा समावेश होता. याशिवाय अबू इस्माईलच्या गोळीबाराला प्रत्युत्तर देणाऱ्या सहाय्यक पोलीस निरीक्षक हेमंत बावधनकर आणि पोलीस उपनिरीक्षक भास्कर कदम यांची सर्व्हीस रिव्हॉल्व्हर जप्त करणा-या पंचाचीही या साक्ष नोंदविण्यात आली. राधाकृष्णन यांनी साक्षीदरम्यान अरुणोदय पदवी कॉलेजमध्ये केवळ आंध्र प्रदेशमधील विद्यार्थीच प्रवेश घेऊ शकतात असं सांगितलं. तसंच आय.डी.वर प्राचार्य म्हणून माझी विद्यार्थ्यांची सही गरजेची असते आणि आय.डी कॉम्प्युटरच्या मदतीने बनवलं जात. अतिरेक्यांकडे सापडलेली आय.डी ही हाताने बनवली असल्याचं राधाकृष्णन यांनी कोर्टाला सांगितलं.