"बाल" युक्तीवाद फोल ठरला....

मुंबईवर हल्ला करतेवेळीस कसाब हा २१ वर्षांपेक्षा अधिक वयाचा होता असा निर्वाळा विशेष कोर्टाने दिलाय. सरकारी पक्षाने कोर्टामध्ये सादर केलेल्या पुराव्यांच्या आधारे कोर्टाने हा निकाल दिलाय. कसाबचं वय निश्चित करण्यासाठी त्याच्या हाडांची आणि दातांची चाचणी करण्यात आली होती. या चाचण्यांचे अहवाल आणि परिस्थितीजन्य पुरावे सरकारी पक्षाने कोर्टासमोर सादर केले होते. सरकारी वकीलांनी कोर्टामध्ये दोन साक्षीदार उपस्थित केले होते. यात आर्थर रोड तुरुंग अधीक्षक स्वाती साठे आणि कसाबला अटक केल्यानंतर त्याच्यावर सर्वात पहिल्यांदा उपचार करणारे डॉक्टर वेंकट राम मूर्ती यानी कोर्टामध्ये साक्ष दिली. निकाल देतेवेळीस कोर्टाने कसाबचे वकील अब्बास काझमी यांचे युक्तीवाद का फेटाळून लावले याचं कारणही दिलं. काझमी यांचा युक्तीवाद आणि त्यावर कोर्टानं काय स्पष्टीकरण दिलं हे पाहूयात

काझमी- नायर हॉस्पीटलमध्ये तयर करण्यात आलेल्या केस पेपरच्या मुख्यपृष्ठावर वय २५ लिहलंय आणि आतल्या कागदांवर त्याचं वय वेगळं लिहलंय असं का ? या रेकॉर्डमध्ये छेडछाड करण्यात आली आहे.

विशेष न्यायालयाचे न्यायाधीश एम.एल.तहिलयानी- पोलिसांनी ज्यावेळी कसाबला नायर हॉस्पीटलमध्ये नेलं तेव्हा त्यांना कसाबचं नाव किंवा त्याचं वय माहीत नव्हतं. इतकंच नाही तर शहरात किती दहशतवादी आहेत आणि त्यांनी कुठे हल्ला केलाय याचीही त्यांना कल्पना नव्हती. त्यामुळे अशा त्रुटी समजण्यासारख्या आहेत.

काझमी- कसाबच्या तुरुंगातील रेकॉर्डमध्ये त्याच्या जन्मतारखेच्या रकान्यासमोर त्याची जन्मतारीख लिहली नसून ती रकान्याखाली कुठेतरी लिहली आहे. ती जाणूनबुजून नंतर लिहली गेली आहे जेणेकरून कसाबचं खोटं वय दाखवता यावं.

विशेष सरकारी वकील उज्जवल निकम- स्वाती साठे यांनी जी माहिती जश्या स्वरूपात मिळाली तशी ती नमूद केली. कसाब हा एक महत्वपूर्ण आरोपी आहे, तो जसजशी माहिती देत गेला तसतशी ती नमूद करण्यात आली. (अटक झाल्यानंतर त्याने आपल्याला आईशी बोलायचं असल्याचं सांगितलं होतं आईशी बोलण्यासाठी त्याने मावशीच्या मुलांचे मोबाईल नंबरही दिले होते.) आणि यामुळेच माहिती थोडी वरखाली झाली आहे. कोर्टाने या युक्तीवाद मान्य करत कसाब हा सज्ञान असल्याचा आदेश दिला.